پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆكە جولدانعان دەپۋتاتتىق ساۋالدا ينتەرنەت الاياقتىق پەن دەرەكتەردىڭ زاڭسىز تارالۋىنا قارسى ناقتى شارالار قابىلداۋ قاجەتتىلىگى ايتىلدى.
دەپۋتاتتىڭ ايتۋىنشا, سوڭعى جىلدارى ازاماتتاردىڭ جەكە دەرەكتەرىنىڭ زاڭسىز جينالۋى مەن ساتىلۋى, ونلاين-الاياقتىق پەن نەسيە راسىمدەۋ فاكتىلەرى جيىلەگەن. مەملەكەت قولعا العان شارالارعا قاراماستان, ينتەرنەت قىلمىستارى ازايماي وتىر. تەك 2025 جىلى ەلىمىزدە 14 مىڭنان استام ينتەرنەت الاياقتىق وقيعاسى تىركەلىپ, زالال كولەمى 6 ملرد تەڭگەدەن اسقان.
ءابۋتالىپ ءمۇتالىنىڭ دەرەكتەۋىنشە, ماۋسىم ايىندا ورىن العان 16 ميلليوننان استام قازاقستاندىقتىڭ جەكە مالىمەتتەرى تارالىپ كەتكەن وقيعا مەملەكەتتىك جانە كۆازيمەملەكەتتىك جۇيەلەردەگى ەلەۋلى وسالدىقتاردى كورسەتتى.
«قاۋىپ تەك مەملەكەتتىك سەكتوردا ەمەس, جەكە كومپانيالاردا دا بار. بانكتەر, تەلەكوم-وپەراتورلار مەن ماركەتپلەيستەر ادالدىق باعدارلامالارى مەن قوسىمشالار ارقىلى ازاماتتاردىڭ گەولوكاتسيالىق دەرەكتەرىن جيناپ, وسال جاعداي تۋعىزۋدا», دەدى دەپۋتات.
ونىڭ پىكىرىنشە, قولدانىستاعى ايىپپۇل كولەمى ءىرى كومپانيالار ءۇشىن تەجەۋ تەتىگىنە اينالا الماي وتىر. سوندىقتان ول حالىقارالىق تاجىريبەگە سۇيەنە وتىرىپ, جەكە دەرەكتەردىڭ زاڭسىز پايدالانىلۋىنا سالىناتىن جازانى كۇشەيتۋدى ۇسىندى. ماسەلەن, ەۋروپالىق وداقتا ايىپپۇل كولەمى كومپانيا اينالىمىنىڭ 4 پايىزىنا دەيىن, قىتايدا 5 پايىزىنا دەيىن جەتەدى.
سونداي-اق دەپۋتات بارلىق زاڭنامالىق جاۋاپكەرشىلىك نورمالارىن ءتيىمدى قولدانۋدى, جەكە دەرەكتەردى زاڭسىز پايدالانعاندارعا جازانى حالىقارالىق ستاندارتتارعا ساي ارتتىرۋدى, مەملەكەتتىك جانە كۆازيمەملەكەتتىك ءىت-جۇيەلەرگە كەشەندى اۋديت جۇرگىزۋدى, انىقتالعان قاۋىپ-قاتەرلەردى جويۋ جوسپارىن ازىرلەۋدى تالاپ ەتتى.
«بۇل قادامدار فورمالدى سيپاتتا قالماۋى كەرەك. ولار ازاماتتاردىڭ ناقتى قورعالۋىنا جانە مەملەكەتتىك جۇيەلەرگە سەنىمدى ارتتىرۋعا باعىتتالۋى ءتيىس», دەدى ءابۋتالىپ ءمۇتالى.
